Xəbərlər

18-19 oktyabr 2023-cü il tarixində Radiasiya Problemləri İnstitutu Naxçıvan Dövlət Universiteti ilə birgə akademik M.K. Kərimovun 75 illik yubileyi münasibəti ilə “Radiasiya təhlükəsizliyi: regional aspektlər” mövzusunda elmi-texniki konfrans keçirmişdir.

Konfransın açılışı Naxçıvan Dövlət Universitetinin Konqres zalında təşkil olunmuşdu. Konfransı giriş sözü ilə açan Universitetin rektoru E.İsayev elm ilə təhsilin inteqrasiyasından, qarşılıqlı əməkdaşlığın əhəmiyyətindən danışmış, müstəqillik günü münasibəti ilə hər kəsi təbrik etmişdir. Sonra çıxış edənlər - AMEA-nın 1-ci vitse prezidenti vəzifəsini icra edən akademik A.Həşimov, Azərbaycan Dövlət Pedaqoji Universitetin elmi işlər üzrə prorektoru professor A.Zamanov, akademik İsmayıl Hacıyev və akademik A.Qəribov Mahmud Kərimovun AMEA-nın prezidenti kimi göstərdiyi çox tərəfli fəaliyyətindən, elmin idarə olunması, kadr siyasəti sahəsində həyata keçirdiyi yeniliklərdən, həmin illərdə hazırladığı Elmin İnkişafı üzrə Milli Strategiyadan, elmi təşkilati fəaliyyətindən söz açmışdır. Çıxış edənlər həm də M.Kərimovla bağlı xatirələrini söyləmişlər.

Açılış mərasiminin sonunda M.Kərimovun laboratoriyasında çalışmış, onun tələbəsi olmuş R.Mehdiyeva akademikin həyatı, elmi və ictimai fəaliyyəti ilə konfrans iştirakçılarını tanış etmiş, bu unudulmaz insanın elmi-tədqiqata olan sonsuz məhəbbətindən söz açmışdır.

Nahar fasiləsindən sonra konfrans bölmələr üzrə işini davam etdirmişdir.

Ənənəvi çıxışlarda AMEA-nın m.ü. O.Səmədov, f-r-e.d., professorlar R.Mədətov, R.Sərdarlı, b.e.d. S.Məmmədli, f.ü.f. doktorları F.Hümbətov, H.Mahmudov, Y.Cəfərov, N.Rzayev, C.Nağıyev və b. elmi məruzələrlə çıxış etmiş, geniş müzakirələr aparılmışdır.

Hibrid formada təşkil edilən konfransda digər iştirakçılar onlayn çıxışlar etmiş, yüksək səviyyəli təqdimatlar təqdim etmişlər.

Konfrans ərəfəsində NDU ilə əməkdaşlıq məsələləri müzakirə edilmişdir.

Konfransın sonunda mədəni-kütləvi tədbirlər sırasında Əshabi-Kəhf ziyarətgahına ziyarət təşkil edilmişdir.

© Bütün hüquqlar qorunur. Xəbərlərdən istifadə edərkən www.irp.science.az saytına istinad zəruridir.