Xəbərlər

01 noyabr 2023-cü il tarixində Azərbaycan Respublikası Elm və Təhsil Nazirliyinin Radiasiya Problemləri İnstitutunda Milli Aviasiya Akademiyasının Aviasiya təhlükəsizliyi kafedrasının I kurs magistrantları üçün seminar təşkil olundu. İnstitutun "İnnovativ tədqiqatlar" qrupunun rəhbəri Namiq Heydərovun təqdimatında “Pilotsuz uçuş aparatlarının müxtəlif sahələrdə tətbiqi” mövzusu magistrantlar tərəfindən maraqla qarşılandı. Mövzu ətrafında geniş müzakirələr aparıldı.

“İnnovativ ionlaşdırıcı şüa qəbulediciləri” laboratoriyasının müdiri, f.e.d., dos. F. Əhmədov 27 oktyabr tarixində Macarıstanın Nüvə Tədqiqatları İnstitutunda olmuşdur. Səfər müddətində Nüvə Tədqiqatları İnstitutunun direktoru Prof. Zsolt Dombradi, CERN qrupunun rəhbəri PhD Ujvári Balázs və MİMF-in rəhbəri Orxan Rəsulovla görüş keçirilmişdir. Macarıstanın Nüvə Tədqiqatları İnstitutu ilə Radiasiya Problemləri İnstitutu arasında 5 ilik əməkdaşlıq müqaviləsi imzalanmışdır.

İnnovativ Şüa qəbulediciləri laboratoriyasının müdiri f.e.d. Fərid Əhmədov oktyabrın 24-də Portuqaliyanın LUSOFONA universitetində keçirilən HORİZON-MSCA çağırışı üzrə qalib olduğu DETMED qrantının ilkin görüşündə iştirak etmişdir. DETMED layihəsinin əsas məqsədi tibbi qamma zondları üçün kompakt ölçülü geniş enerji diapazonunda işləyən yeni detektor modullarının hazırlanması və onun parametrlərinə xarici təsirlərin öyrənilməsidir.

Radiasiya Problemləri İnstitutunun İnnovativ şüa qəbulediciləri laboratoriyasının əməkdaşları f.e.d. Fərid Əhmədov, f.e.d. Zirəddin Sadıqov və f.ü.f.d. Qadir Əhmədov Türkiyənin TUBİTAK-BİLGEM mərkəzində olublar. Səfərin əsas məqsədi gələcəkdə birgə işlərin görülməsi və selvari fotodiodların tətbiq istiqamətlərinin genişləndirilməsi olmuşdur.

Hər il oktyabr ayının sonuncu həftəsi bütün dünyada qurğuşunsuz boya həftəsi keçirilir. Bu münasibətlə 27 oktyabr 2023-cü il tarixində, qurğuşunsuz boya həftəsinin başa çatdığı gün Radiasiya Problemləri İnstitutunda Gənc alim və mütəxəssislər Şurası tədbir keçirmişdir. Tədbirdə İnstitutun rəhbərliyi, kimyaçı alımlər və Şuranın üzvləri iştirak etmişlər.

Avropa komissiyasının dəstəyi ilə yerinə yetirilən Horizon-MSCA- İNNMEDSCAN qrantı üzrə Çexiyanın Qərbi Bohemia Universitetinin Elektronika mühəndisliyi və informasiya texnologiyaları fakültəsinin mütəxəssisləri Radiasiya Problemləri İnstitutunda ezamiyyətdə olmuşlar. Ezamiyyətin əsas məqsədi qrant layihəsinin 1-ci iş paketi üzrə elektronik dövrələrin hazırlanması və hazırlanan elektronik dövrələrin gələcəkdə Radiasiya Problemləri İnstitutunun və Rəqəmsal İnkişaf Agentliyinin yüksək aktivlikli Co-60 mənbələrindən istifadə edərək qamma şüalara qarşı radiasiya davamlılığının tədqiq edilməsi istiqamətində geniş müzakirələr aparmaqdır.

Azərbaycan Respublikası Elm və Təhsil Nazirliyinin Radiasiya Problemləri İnstitutunun “Heterogen proseslərin radiasiya kimyası” laboratoriyasının rəhbəri, kimya elmləri doktoru, professor Teymur Ağayev 19-21 oktyabr 2023-cü il tarixində Özbəkistan Respublikasının Daşkənd şəhərində Özbəkistan EA-nın və Fizika-Texnika İnstitutunun 80 illiyi, Materialşünaslıq İnstitutunun isə 30 illiyinə həsr olunmuş “Müasir fizikanın fundamental və tətbiqi problemləri” adlı Beynəlxalq konfransında iştirak etmişdir.

18-19 oktyabr 2023-cü il tarixində Radiasiya Problemləri İnstitutu Naxçıvan Dövlət Universiteti ilə birgə akademik M.K. Kərimovun 75 illik yubileyi münasibəti ilə “Radiasiya təhlükəsizliyi: regional aspektlər” mövzusunda elmi-texniki konfrans keçirmişdir.

Konfransın açılışı Naxçıvan Dövlət Universitetinin Konqres zalında təşkil olunmuşdu. Konfransı giriş sözü ilə açan Universitetin rektoru E.İsayev elm ilə təhsilin inteqrasiyasından, qarşılıqlı əməkdaşlığın əhəmiyyətindən danışmış, müstəqillik günü münasibəti ilə hər kəsi təbrik etmişdir. Sonra çıxış edənlər - AMEA-nın 1-ci vitse prezidenti vəzifəsini icra edən akademik A.Həşimov, Azərbaycan Dövlət Pedaqoji Universitetin elmi işlər üzrə prorektoru professor A.Zamanov, akademik İsmayıl Hacıyev və akademik A.Qəribov Mahmud Kərimovun AMEA-nın prezidenti kimi göstərdiyi çox tərəfli fəaliyyətindən, elmin idarə olunması, kadr siyasəti sahəsində həyata keçirdiyi yeniliklərdən, həmin illərdə hazırladığı Elmin İnkişafı üzrə Milli Strategiyadan, elmi təşkilati fəaliyyətindən söz açmışdır. Çıxış edənlər həm də M.Kərimovla bağlı xatirələrini söyləmişlər.

17 oktyabr 2023-cü il tarixində Radiasiya Problemləri İnstitutunda Müstəqilliyin bərpası günü münasibəti ilə təntənəli tədbir keçirilmişdir. Tədbirdə ilk öncə Qarabağ müharibəsində şəhid olan övladlarımızın ruhu bir dəqiqəlik sükutla yad edilmiş, sonra isə respublika himni çalınmışdır.

Tədbiri giriş sözü ilə açan institutun baş direktoru İ.Mustafayev müstəqilliyin bərpası gününün əhəmiyyətindən danışmış, ölkəmizi bu günə aparan yol xəritəsini təqdim etmişdir. Sonra söz institutun icraçı direktoru R.Mehdiyevaya verilmişdir. O, bu gün ölkəmizin müstəqilliyinin bərpası gününə müstəqilliyin tam və qəti qələbəsi ilə gəldiyimizi söyləmiş, cənab Ali Baş Komandanın 15 oktyabr tarixində Xankəndidə Azərbaycan Respublikasının üç rəngli bayrağını qaldırması ilə ölkəmizin müstəqilliyinin tam bərpa olunduğunu söyləmişdir.

Hörmətli həmkarlar!

Sizi 5 Oktyabr – Beynəlxalq Müəllimlər Günü münasibətilə ürəkdən təbrik edir, möhkəm cansağlığı, gələcək aydın nəsillərin yetişməsindəki şərəfli və fədakar pedaqoji fəaliyyətinizdə yeni-yeni uğurlar arzu edirəm.

Bayramınız mübarək!

Hörmətlə,

İslam MUSTAFAYEV
Azərbaycan Respublikası Elm və Təhsil Nazirliyinin
Radiasiya Problemləri İnstitutunun Baş direktoru,
AMEA-nın müxbir üzvü, professor

Azərbaycan Respublikası Elm və Təhsil Nazirliyinin Radiasiya Problemləri İnstitutunda Türkiyənin Bolu Abant İzzet Baysal Universitetinin professoru Ercan Yılmaz tərəfindən “Sensor texnologiyaları”na həsr olunmuş seminar keçirilib.

Avropa komissiyasının maliyyələşdirdiyi HORIZON-MSCA-2021-SE-01 çağırışı üzrə Nüvə Təbabəti üçün Qabaqcıl Hibrid “Maqnit Rezonans/Pozitron Emissiya Tomoqrafiyası” Skanerləri üçün İnnovativ Fotodetektor Modulu (Innovative Photodetector Module for advanced Hybrid “Magnetic Resonance Imaging/Positron Emission Tomography” Scanners for Nuclear Medicine (Grant Number No. 101086178) within the EU Horizon 2021 MSCA Staff Exchanges program HORIZON-MSCA-2021-SE-01) adlı layihə çərçivəsində keçirilən seminarda Radiasiya Problemləri İnstitutunun, Fizika İnstitutunun və Bolu Abant İzzet Baysal Universitetinin alimləri iştirak edib.

Azərbaycan Respublikası Elm və Təhsil Nazirliyinin Radiasiya Problemləri İnstitutunda “27 sentyabr – Anım Günü”nə həsr olunmuş tədbir keçirilib.

Tədbirdə əvvəlcə Azərbaycan Respublikasının Dövlət Himni səsləndirilib, daha sonra saat 12:00-da Vətən müharibəsi şəhidlərinin əziz xatirəsi bir dəqiqəlik sükutla yad edilib.

Anım tədbirində giriş sözü ilə çıxış edən Radiasiya Problemləri İnstitutunun Baş direktoru, AMEA-nın müxbir üzvü, professor İslam Mustafayev Vətən müharibəsi və rəşadətli Azərbaycan ordusunun yazdığı qəhrəmanlıq dastanından danışıb, əsgər və zabitlərimizlə daima qürur duyduğunu bildirib.

Müzəffər Ali Baş Komandanın rəhbərliyi ilə son günlərdə aparılan antiterror əməliyyatlarına da toxunan İ.Mustafayev yeni hərbi qənimətlərin əldə olunduğunu, həmçinin qısa bir zamanda zəfərlə yekunlaşdığını bildirib. Qeyd edib ki, artıq üçrəngli müqəddəs bayrağımız Xankəndində dalğalanmaqdadır.

Azərbaycan Respublikası Elm və Təhsil Nazirliyinin Radiasiya Problemləri İnstitutunun (RPİ) Elmi Şurasının növbəti iclası keçirilib.

Giriş sözü ilə çıxış edən İnstitutun Baş direktoru, AMEA-nın müxbir üzvü, professor İslam Mustafayev Gündəlikdəki məsələləri iclas iştirakçılarının diqqətinə çatdırıb.

İclasda əvvəlcə 2023-cü ildə fəlsəfə və elmlər doktoru hazırlığı üzrə doktorantura və dissertanturaya qəbulun nəticələri, eləcə də cari il üçün Fəaliyyət Planının müzakirəsi, yerinə yetirilməmiş fəaliyyətlərin planlaşdırılması haqqındakı məsələlərə baxılıb.

Sonra iclasda 2024-cü ildə keçiriləcək konfrans və hesabat ili üçün illik mühüm elmi nəticələr müzakirə edilib.

Azərbaycan Respublikası Elm və Təhsil Nazirliyinin Radiasiya Problemləri İnstitutunun gənc alimləri 13-15 sentyabr tarixlərində Bakıda təşkil olunan “Nüvə kriminalistikası” üzrə Yay Məktəbində iştirak ediblər.

İnnovasiya və Rəqəmsal İnkişaf Agentliyinin Nüvə Tədqiqatları Departamenti, Ukraynanın Elm və Texnologiya Mərkəzi, Kiyev Nüvə Tədqiqatları İnstitutunun təşkil etdiyi Yay Məktəbində RPİ-nin “İnnovatin ionlaşdırıcı şüa qəbulediciləri” laboratoriyasının əməkdaşları Arzu Məmmədli və Çiçək Abbasova, “Radiokimya və radioprotektorlar” laboratoriyasının əməkdaşı Ülviyyə Əliyeva-Cabbarlı və “Radioekologiya” laboratoriyasının əməkdaşı Hüsniyyə Necati Solut iştirak etmişdir.