Xəbərlər

Azərbaycan Milli Elmlər Akademiyasının (AMEA) Radiasiya Problemləri İnstitutunun “Nizamsız bərk cisimlərin radiasiya fizikası” laboratoriyasının aparıcı elmi işçisi, fizika elmləri doktoru, dosent Mətanət Mehrabova Türkiyənin Kayseri şəhərində keçirilən “USBİK 2021 təbiət elmləri” adlı onlayn beynəlxalq konfranda iştirak edib.

M.Mehrabova konfransda Cd_1-xMn_xSe və Cd_1-xFe_xS yarımmaqnit yarımkeçiricilərinin nəzəri və eksperimental tədqiqatlarının nəticələrinə həsr edilmiş “Ab initio calculation of interstitial atom effects in Cd_1-xMn_xSe” mövzusunda plenar məruzə ilə çıxış edib. Daha sonra onun həmmüəllifi olduğu daha 5 iş isə alimin doktorantları - Sona Hüseynli və digərləri tərəfindən məruzə edilib. Məruzələr iştirakçılar tərəfindən çox maraqla qarşılanıb.

Konfransda nəzəri olaraq Cd_1-xMn_xSe üçün ideal və defekt hallarında elektron zona quruluşunun hesablanması, eksperimental olaraq isə Cd_1-xFe_xS üçün sintaz məsələləri, eptaksial nazik təbəqənin alınması, kristal quruluşunun öyrənilməsi üzrə alınmış nəticələr ətrafında müzakirələr aparılıb. Sonda konfrans iştirakçılarına sertifikatlar təqdim edilib.

Qeyd edək ki, M.Mehrabova sözügedən konfransın həm də təşkilat komitəsinin üzvü olub və bölməyə rəhbərlik edib.

© Bütün hüquqlar qorunur. Xəbərlərdən istifadə edərkən www.irp.science.az saytına istinad zəruridir.