Xəbərlər

Azərbaycan Respublikası Elm və Təhsil Nazirliyinin Radiasiya Problemləri İnstitutunun (RPİ) Elmi Şurasının növbəti iclası keçirilib.

Giriş sözü ilə çıxış edən İnstitutun Baş direktoru, AMEA-nın müxbir üzvü, professor İslam Mustafayev Gündəlikdəki məsələləri iclas iştirakçılarının diqqətinə çatdırıb.

İclasda əvvəlcə “Azərbaycan Respublikasının işğaldan azad edilmiş ərazilərinə Böyük Qayıdışa dair Dövlət Proqramı”nın icrası və RPİ-nin 2023-cü il üçün Fəaliyyət Proqramı haqqındakı məsələlərə baxılıb.

Hörmətli xanımlar!

Sizi 8 Mart – Beynəlxalq Qadınlar Günü münasibətilə ürəkdən təbrik edir, hər birinizə cansağlığı, səadət və gələcək işlərinizdə uğurlar arzulayıram.

Bayramınız mübarək olsun!

Hörmətlə,

İslam Mustafayev
Radiasiya Problemləri İnstitutunun Baş direktoru,
AMEA-nın müxbir üzvü, professor

Azərbaycan Respublikası Elm və Təhsil Nazirliyinin Radiasiya Problemləri İnstitutunda (RPİ) “8 Mart – Beynəlxalq Qadınlar Günü” münasibətilə “Qadın gülərsə” adlı tədbir keçirilib.

İnstitutun Həmkarlar Təşkilatı və Gənc Alim və Mütəxəssislər Şurasının təşkilatçılığı ilə keçirilən tədbirdə giriş sözü ilə çıxış edən RPİ-nin Baş direktoru, AMEA-nın müxbir üzvü, professor İslam Mustafayev Azərbaycan qadınının ölkənin ictimai-siyasi və mədəni həyatındakı rolundan danışıb, tariximizdə önəmli xidmətləri olan qadın simalar haqqında tədbir iştirakçılarına məlumat verib.

“8 Mart – Beynəlxalq Qadınlar Günü” münasibətilə İnstitutun qadın əməkdaşlarını təbrik edən İ.Mustafayev onların elmi-ictimai fəaliyyətinə də toxunub, həmçinin onları beynəlxalq əməkdaşlıq əlaqələrində yaxından iştirak etməyə və Azərbaycan elminin təbliğində daha aktiv olmağa çağırıb.

Azərbaycan Respublikası Elm və Təhsil Nazirliyinin Radiasiya Problemləri İnstitutunda “1 Mart – Beynəlxalq Mülki-müdafiə Günü”nə həsr olunmuş “Risklərin informasiya texnologiyalarında rolu” mövzusunda tədbir keçirilib.

İnstitutun 2023-cü il üçün təsdiq edilmiş Tədbirlər Planı üzrə keçirilmiş tədbirdə RPİ-nin baş mühəndisi Xəyyam Səfixanov çıxış edərək mövzu üzrə məlumat verib.

Daha sonra İnstitutun Mülki-müdafiə Qərargahının rəisi Taleh Məmmədov “1 Mart – Beynəlxalq Mülki-müdafiə Günü”nün tarixi və Azərbaycanda bu sahədə görülmüş işlər haqqında tədbir iştirakçılarına məlumat verib, onların suallarını cavablandırıb.

Azərbaycan Respublikası Elm və Təhsil Nazirliyinin Radiasiya Problemləri İnstitutunun Gənc Alim və Mütəxəssislər Şurasının növbədənkənar iclası keçirilib.

İclasda çıxış edən RPİ-nin Baş direktoru, AMEA-nın müxbir üzvü, professor İslam Mustafayev gənclərin ölkəmizin ictimai-siyasi və elmi-mədəni həyatındakı rolundan danışıb, eləcə də Azərbaycan gəncliyini daim əzmkar və vətənpərvar olmağa çağırıb.

İclasda Şuranın sədri vəzifəsindən könüllü olaraq arılan Əli Məmmədov çıxış edərək gənclər üçün yaradılmış şəraitə görə İnstitut rəhbərliyinə təşəkkürünü bildirib, həmçinin gələcəkdə fəaliyyətinin bir hissəsinin də məhz elmə istiqamətlənəcəyini bildirib.

Azərbaycan Respublikası Elm və Təhsil Nazirliyinin Radiasiya Problemləri İnstitutunda “26 Fevral – Xocalı soyqırımı günü”nə həsr olunmuş tədbir keçirilib.

İnstitutun Həmkarlar Təşkilatı və Gənc Alim və Mütəxəssislər Şurasının birgə təşkilatçılığı ilə keçirilən tədbirdə əvvəlcə Azərbaycan Respublikasının Dövlət Himni səsləndirilib, daha sonra Xocalı soyqırımı qurbanları və Azərbaycan Respublikasının ərazi bütövlüyü uğrunda canlarından keçmiş şəhidlərin əziz xatirəsi 1(bir) dəqiqəlik sükutla yad edilib.

Anım tədbirində giriş sözü ilə çıxış edən Radiasiya Problemləri İnstitutunun Baş direktoru, AMEA-nın müxbir üzvü, professor İslam Mustafayev Xocalı faciəsinin erməni millətçilərinin yüzilliklər boyu xalqımıza qarşı apardıqları soyqırımı və etnik təmizləmə siyasətinin qanlı səhifəsi, öz amansızlığına və qəddarlığına görə bəşəriyyətə və insanlığa qarşı törədilən amansız bir cinayət olduğunu qeyd edib. Bildirib ki, xalqımız mənfur düşmənin vəhşiliklərini, eləcə də bu cinayətlərin iştirakçılarını unutmayıb və heç vaxt unutmayacaqdır.

Azərbaycan Respublikası Elm və Təhsil Nazirliyi, Təhsil İnstitutu, Gənclər və İdman Nazirliyi, Heydər Əliyev Mərkəzi, Azərbaycan Həmkarlar İttifaqları Konfederasiyası, Azərbaycan Milli Elmlər Akademiyası və BP şirkətinin təşkilatçılığı ilə keçirilən builki “Sabahın alimləri” XII respublika müsabiqəsi Radiasiya Problemləri İnstitutunun aliminin rəhbərlik etdiyi şagirdlər mükafat qazanıblar.

Azərbaycan Respublikası Elm və Təhsil Nazirliyinin Radiasiya Problemləri İnstitutunda (RPİ) ali təhsil ocaqları ilə qarşılıqlı əməkdaşlıq əlaqələrinə əsasən istehsalat təcrübəsi keçəcək universitet tələbələri ilə görüş keçirilib.

Görüşdə çıxış edən RPİ-nin Baş direktoru, AMEA-nın müxbir üzvü, professor İslam Mustafayev tələbələri salamlayıb, həmçinin İnstitutun tarixi, elmi tədqiqat istiqamətləri, əldə olunmuş nailiyyətlər və kadr potensialı haqqında məlumat verib.

Öz çıxışında elm və təhsilin qarşılıqlı əlaqəsinə də toxunan İ.Mustafayev ənənəvi olaraq təşkil olunan “Sabahın alimləri” Respublika müsabiqəsi və onun əhəmiyyətindən bəhs edib, eyni zamanda builki müsabiqədə də İnstitut alimlərinin aktiv iştirak etdiyini və onların rəhbərliyi ilə hazırlanmış 4 layihənin qalib olduğunu bildirib.

Azərbaycan Respublikası Elm və Təhsil Nazirliyinin Radiasiya Problemləri İnstitutunun “İnnovativ ionlaşdırıcı şüa qəbulediciləri” laboratoriyasının alimlərinin yeni silisium əsaslı fotoelektron gücləndiricilərin Hibrid Skanerlərində tətbiqinin öyrənilməsi üçün hazırlayacağı “Nüvə Təbabəti üçün Qabaqcıl Hibrid “Maqnit Rezonans/Pozitron Emissiya Tomoqrafiyası” Skanerləri üçün İnnovativ Fotodetektor Modulu” adlı layihə qalib elan edilib.

HORIZON-MSCA-2021-SE-01 çağırışı üzrə təqdim edilən və Avropa Komissiyasının maliyələşdiridiyi layihənin 6 iş paketi üzrə 48 ay müddətində yerinə yetirilməsi planlaşdırılıb.

Azərbaycan Respublikası Elm və Təhsil Nazirliyinin Radiasiya Problemləri İnstitutunun “Seqnetoelektriklərin radiasiya fizikası” laboratoriyasının aparıcı elmi işçisi, dosent Famin Tahir oğlu Salmanova Azərbaycan Respublikasının Prezidenti yanında Ali Attestasiya Komissiyasının 17.01.2023-ci il tarixli qərarı ilə “fizika elmləri doktoru” elmi dərəcəsi verilib.

Azərbaycan Respublikası Elm və Təhsil Nazirliyinin Radiasiya Problemləri İnstitutu və Fizika İnstitutunun Qadınlar şuralarının birgə təşkilatçılığı ilə BMT-nin 11 Fevral “Qadınlar və qızlar elmdə” Beynəlxalq Gününə həsr olunmuş tədbir keçirilib. Tədbirdə Azərbaycan Milli Elmlər Akademiyasının Qadınlar Təşkilatının rəhbərliyi və institutların qadın əməkdaşları iştirak ediblər.

Tədbirdə əvvəlcə Azərbaycan Respublikasının Dövlət Himni səsləndirilib.

Daha sonra Vətənin ərazi bütövlüyü uğrunda canlarından keçmiş şəhidlərimizin əziz xatirəsi, eləcə də qardaş Türkiyədə vəfat etmiş zəlzələ qurbanları hörmət və ehtiramla yad edilib.

Azərbaycanın birinci xanımı, Heydər Əliyev Fondunun prezidenti Mehriban Əliyevanın göstərişinə əsasən, Türkiyənin zəlzələ bölgəsinə növbəti humanitar yardım təyyarəsi yola düşüb.

Budəfəki humanitar yardıma faciədən zərər çəkmiş şəxslər üçün zəruri olan əlavə avadanlıqlar, o cümlədən qızdırıcısı olan çadırlar, generatorlar, istilik radiatorları, çöl üçün qızdırıcılar, dizel yanacaqlı kaloriferlər, həmçinin axtarış-xilasetmə işlərinə dəstək məqsədilə ləvazimat və avadanlıqlar daxildir.

Heydər Əliyev Fondunun nümayəndəsi Aydan Məhərrəmli hava limanında jurnalistlərə müsahibəsində deyib ki, Heydər Əliyev Fondu, “AzərEnerji” ASC və “Azərişıq” ASC-nin dəstəyi ilə göndərilən yardım fevralın 11-də zəlzələ bölgəsinə çatdırılacaq. Türkiyədə havanın çox soyuq olduğunu və buna görə insanların qızdırıcı cihazlara ehtiyacı yarandığını nəzərə alaraq, budəfəki humanitar yardımda içərisində qızdırıcı olan çadırlar, istilik radiatorları, generatorlar da göndərilib. Xilasetmə işlərinə dəstək olmaq məqsədilə digər zəruri avadanlıqlar da göndərilən yardıma daxildir.

Fevralın 10-u Azərbaycan elminin görkəmli nümayəndəsi, fizika-riyaziyyat elmləri doktoru, professor, akademik Mahmud Kərimovun anım günüdür.

Azərbaycan Respublikası Elm və Təhsil Nazirliyinin Radiasiya Problemləri İnstitutunun Baş direktoru, AMEA-nın müxbir üzvü, professor İslam Mustafayev və İnstitutun laboratoriya rəhbərləri görkəmli alimin məzarını ziyarət ediblər.

Qeyd edək ki, Respublikamızda fizika elminin inkişafına qiymətli töhfələr vermiş Mahmud Kərimov zəngin elmi fəaliyyəti ilə radiasiya fizikası və informatika sahələrinin yeni biliklərlə zənginləşməsində mühüm rol oynayıb. Alimin tədqiqatlarının başlıca istiqaməti dielektriklər fizikası ilə bağlıdır. Onun bir çox istiqamətlər üzrə müəyyən etdiyi metodlar və gəldiyi elmi nəticələr həmişə öz aktuallığı, fundamental-nəzəri və tətbiqi əhəmiyyəti ilə seçilib. M.Kərimov Azərbaycan Milli Elmlər Akademiyasının prezidenti kimi elmimizin dünya elminə sürətlə inteqrasiya olunması istiqamətində səylə çalışıb.

Azərbaycan Respublikasının Birinci vitse-prezidenti Mehriban xanım Əliyeva rəsmi instaqram səhifəsində Türkiyədəki zəlzələdən zərər çəkənlərə humanitar yardımla bağlı paylaşım edib.

Paylaşımda qeyd olunub:

“Əziz həmvətənlər!

Hər zaman birlik və həmrəylik nümayiş etdirərək bir-birinə kömək etməyə hazır olmaq, əl-ələ verərək çətinliklərdən və sınaqlardan birlikdə üzüağ çıxmaq Azərbaycan xalqının ən gözəl xüsusiyyətlərindən biridir. Qardaş Türkiyədə baş vermiş dəhşətli zəlzələnin ilk saatlarından Türkiyə xalqına göstərdiyiniz dəstək xalqlarımız arasında qardaşlıq, dostluq münasibətlərinin, qarşılıqlı sevginin sarsılmazlığının, möhkəmliyinin, əbədiliyinin növbəti əyani sübutudur.